والله العظيم باعشقك يا مصر باحبك وبادوب فيكى يا مصر
ظروفى وظروفك سودة ما يعلم بيها الاربنا ولكن هنعمل ايه مش ذنبى ولا ذنبك ياحبيبتى
انا جوة ارضك مسجون وفوق ترابك محروم حتى من النوم كل ما اسمع صوت عربية اقول هما ...اكيد هما
امى اللى هى بنتك يا مصر قالتلى انها سمعت عربيه بالليل ماشية من جنب البيت اتخضت وخافت وقالت يا عينى يا ابنى هم جايين يخدوك
عارفه الساعه كانت كام يا مصر كانت اتنين بالليل
ايه ذنبى يا بلدى انى اعيش جواكى مسجون... مسجون فى هدومى مخنوق مش عارف انطق او اتكلم
عارفة يا حبيبتى انا باكتب دلوقتى وخايف اكون الصبح قاعد فى حتة تانية خالص
ولكن ايه الفرق يا بلدى ايه الفرق ما انا مسجون وانتى مسجونة زيى بالضبط
هما سرقوا حقى واغتصبوا حريتى ولكن مين.... دا بعدهم... دا انا ابنك يامصر هما لسه ما يعرفونيش كويس بس مش مهم اكيد وقتى جى
جاى الوقت اللى هاقدر فيه امسك ايدك وارفع جبينك واقولك يا حلمى يا املى يا عشقى يا حبيبتى يا مصر
تعرفى ..امى لما سمعت صوت العربية وخافت عليا ما قلتش ليا ما تعملش كده تانى لا دى شجعتنى وهى عارفة ايه اللى ممكن يحصل ليا
يا مصر يا امى انا وانت مساجين ولكن سجننا قرب ينكسر واكيد الظلم هينتهى يا امى
مش مهم ينتهى وانا عايش ومش مهم اعيش لغاية ما اشوف العدل والخير بيعم ولكن يكفينى انهم مش هيقدروا يظلمونى عارفه ليه علشان انا رافض لظلمهم
زمان قال الامام ايه قال المجاهد:-( ماذا يفعل اعدائى بى ) وهما هيعملوا فينا ايه يا حبيبتى انا وانت اعظم منهم كلهم والله يا بلادى
عارفه يا مصر
اقسم بالله انا باعشقك عشق
No comments:
Post a Comment